Umunyecongo, Salukondo Mamisa Faruda, wakundanye n’umunyarwanda yahawe ubwenegihugu

Yanditswe na KT Radio Team October 14, 2020 - 08:30

Mu karere ka Rubavu, kuri uyu wa kabiri, Salukondo Mamisa Faruda umugore w’umukongomani wakundanye n’umunyarwanda akamukurikira mu Rwanda, yashyikirijwe ubwenegihugu bw’u Rwanda.

Ubwo Perezida Paul Kagame yasuraga akarere ka Rubavu tariki ya 10 gicurasi 2019 Salukondo Mamisa yasabye Perezida ubwenegihugu kuko yashakanye n’umunyarwanda ndetse bakaba barabyaranye.

Mu kiganiro na KT Radio, nyuma yo guhabwa ubwenegihugu Salukondo Mamisa yavuze ko yishimiye kuba umunyarwanda kandi ashimira Perezida Paul Kagame kuba yarabimusezeranyije, none bikaba bibaye.

Umuyobozi w’akarere ka Rubavu Habyarimana Gilbert yamumenyesheje ko guhabwa ubwenegihugu bijyana no kugira uburenganzira nk’umunyarwanda ariko kandi bikagira inshingano bitanga zirimo gukorera igihugu no kukitangira.