Umujyi wa Kigali urashaka gusenya sitasiyo ya Mirimo ariko umugore we yabyanze

Yanditswe na KT Radio Team January 8, 2021 - 08:43

Ubuyobozi bw’Umujyi wa Kigali bwavuze ko bugiye gusenya sitasiyo ya ‘essence’ ya nyakwigendera Mirimo Gaspard yegereye ikiraro cyubakwa kuri ruhurura ya Mpazi muri Nyabugogo, n’ubwo umufasha we Winifride Gahongayire yitambitse asaba ko babanza gusenya sitasiyo zose ziri mu bishanga i Kigali.

Gahongayire yahise abwira itangazamakuru ko afite icyemezo cy’urukiko kibuza Ubuyobozi bw’Umujyi wa Kigali gusenya inyubako z’umugabo we witabye Imana mu mwaka wa 2016, kubera iyo mpamvu ngo ntateze kwemera ko sitasiyo icuruza ibikomoka kuri peterori ye, isenywa mu gihe hakiri n’izindi zitarasenywa kandi nazo ngo ziri mu gishanga.

Gahongayire avuga ko uretse sitasiyo, inzu zari iruhande rwayo nazo ngo zitagombaga gusenywa kuko Urukiko rw’Ikirenga rwamwemereraga ingurane mu rubanza rwaciwe mu mwaka wa 2005, ndetse ko Ibiro bya Minisitiri w’Intebe na byo byamwemereye mu mwaka ushize wa 2020, ko azahabwa ingurane.

Ku rundi ruhande ariko, Ubuyobozi bw’Umujyi wa Kigali buvuga ko ibikorwa biri mu gishanga byose nta ngurane bigomba guhabwa kuko bihari mu buryo butubahirije amategeko.

Tanga Igitekerezo