Rusesabagina yaje mu rukiko nta mwunganizi, Nsabimana Callixte abyita ‘amayeri yo gutinza urubanza’

Yanditswe na KT Radio Team March 11, 2021 - 11:33

Urugereko rwihariye rw’Urukiko Rukuru ruburanisha ibyaha mpuzamahanga n’ibyambuka imbibi, rwasubitse urubanza ruregwamo Paul Rusesabagina, Nsabimana Callixte, Nsengimana Herman n’abandi bantu 18, bose baregwa ibyaha bifitanye isano n’iterabwoba.

Byari byitezwe ko uru rubanza rutangira kuburanishwa mu mizi, nyuma y’uko inzitizi yari yatanzwe n’uruhande rwa Rusesabagina Paul urukiko ruyitesheje agaciro ku wa Gatatu tariki 10 Werurwe 2021.

Iyo nzitizi yasabaga ko Paul Rusesabagina yafungurwa by’agateganyo, kuko uburyo afunzwemo bunyuranyije n’amategeko kuko yageze mu Rwanda ashimuswe.

Mu iburanisha ryo kuri uyu wa Kane, Rusesabagina yavuze ko atiteguye kuburana kuko atunganiwe.

Yabwiye urukiko ko ku wa Gatatu bakimara gusomerwa icyemezo cy’urukiko ku mbogamizi bari batanze basaba gufungurwa by’agateganyo bahise bakijuririra, banasaba urukiko ko iburanisha mu mizi ryaba rihagaze ubwo bujurire bukabanza bugakemuka.

Aha ngo ni ho Rusesabagina n’umwunganizi we bafashe umwanzuro ko kuri uyu wa Kane bari bubanze guhura bakiga kuri ubwo bujurire, ko bo batari bazi ko iburanisha riri bukomeze.

Ubushinjacyaha bwagaraje ko kuba umwunganizi wa Rusesabagina atagaragaye mu rukiko kandi asanzwe azwiho ubunyamwuga, bisa no gusuzugura urukiko, bagamije kubangamira nkana imigendekere myiza y’urubanza.

Ubushinjacyaha bwanibajije uburyo Rusesabagina yumvikanye n’umwunganira ko nta buranisha rihari, none we akaba yagaragaye mu rukiko ariko umwunganira ntahagere.

Me Moise Nkundabarashi wunganira Nsabimana Callixte, yasabye urukiko ko rwasuzuma impamvu yatumye ubwunganizi bwa Rusesabagina rutitaba urukiko, rukanzura ko iburanisha rikomeza ku bandi baburanyi cyane cyane Nsabimana Callixte wagombaga kubazwa.

Rusesabagina yabajijwe niba ibyo bisabwa na Me Moise Nkundabarashi hari icyo byamubangamiraho, avuga ko bimubangamiye kuko ahsobora kugira ibyo abazwa ku byo Nsabimana yavuze kandi akaba atiteguye kubisubiza atunganiwe.

Rusesbaagina ariko yongeyeho ko aramutse ntacyo abajijwe ku biri buvugwe na Nsabimana Callixte, nta cyo byamubangamiraho, na cyane ko avuga ko nta ho ahuriye na byo.

Bamwe mu bunganizi b’abandi baburanyi muri uru rubanza ndetse n’abunganira abaregera indishyi, na bo basabye ko urukiko rwakwemeza ko iburanisha rikomeza ku baburanyi bahari, kuko bamaze iminsi baza mu rukiko bifuza kuburana.

Ubushinjacyaha ariko bwavuze ko ku bw’inyungu z’ubutabera, kuba urubanza rwakomeza hari ababuranyi batunganiwe bbyafatwa nko guhatira abantu kuburana, bityo bugasaba ko urukiko rwakwimura iburanisha rigashyirwa ku wa gatanu.

Icyakora ubushinjacyaha busaba urukiko ko Me Rudakemwa wunganira Rusesabagina yafatirwa ibihano, kandi agategekwa kuzitabira iburanisha ryo ku wa gatanu.

Nsabimana Callixte yavuze ko atarwanya ibyo kuba Rusesabagina ataburana adafite umwunganizi, kuko ari uburenganzira bwe bw’ibanze.

Icyakora kuri Nsabimana n’umwunganizi we Me Moise Nkundabarashi, bavuga ko bamaze imyaka irenga ibiri mu rukiko kandi batigeze bananiza urukiko, bityo ko basanga ibyo uruhande rwa Paul Rusesabagina rukora ari ugutinza urubanza nkana.

Nyuma yo kwiherera, urukiko rwanzuye ko urubanza rugomba gusubikwa, kugira ngo hubahirizwe uburenganzira bw’ababuranyi baburana batunganiwe.

Rwemeje ko ruzasubukurwa ku wa gatanu 12 Werurwe 2021, saa mbili n’igice za mu gitondo.

Rwategetse kandi ko abunganizi bose batabonetse mu iburanisha rya none bagomba kuzitabira iburanisha ryo ku wa gatanu.

Tanga Igitekerezo