Théoneste Bagosora yangiwe gufungurwa atarangije igihano

Yanditswe na KT Radio Team April 2, 2021 - 12:29

Ejo ku wa Kane tariki ya 1 Mata 2021, Umucamanza Carmel Agius, Perezida w’Urwego Mpuzamahanga rwasigaranye inshingano z’icyahoze ari urukiko mpuzamahanga mpanabyaha rwashyiriweho u Rwanda (IRMCT), yatesheje agaciro icyifuzo cya Théoneste Bagosora wasabaga kurekurwa mbere y’uko asoza igihano yakatiwe.

Bagosora wahoze ari Coloneli mu ngabo za FAR, ari gukora igihano cy’igifungo cy’imyaka 35 muri Mali kuva ku ya 1 Nyakanga 2012.

Yatawe muri yombi ku ya 9 Werurwe 1996 muri Cameroun, ajyanwa i Arusha tariki 23 Mutarama 1997.

Tariki ya 18 Ukuboza 2008, Urugereko rwa Mbere rw’Iremezo rw’urukiko mpuzamahanga mpanabyaha (ICTR), rwahamije Bagosora ibyaha bya Jenoside, ubwicanyi, gutsemba no gutoteza nk’ibyaha byibasiye inyokomuntu, gufata ku ngufu n’ibindi byaha, rumukatira igifungo cya burundu.

Ku ya 14 Ukuboza 2011, Urugereko rw’Ubujurire, icyo gihe rwari ruyobowe n’umucamanza Theodore Meron, rwagabanyije igihano cy’igifungo cya burundu, rumuhanisha gufungwa imyaka 35.

Théoneste Bagosora yatanze icyifuzo cyo kurekurwa mbere y’uko asoza igihano cye, muri Werurwe 2019.

Nk’uko iki cyemezo kibigaragaza, Bagosora yari yerekanye ko aramutse arekuwe, yifuza kujya gutura mu Buholandi cyangwa se agakomeza gutura muri Mali.

Umucamanza Carmel Agius yavuze ko nta gihugu na kimwe muri ibyo bihugu cyakwemera kumwakira, na cyane ko mu cyifuzo cye Bagosora na we atagaragaje niba hari igihugu muri ibi cyamemereye kumwakira.

Umucamanza Carmel Agius yavuze ko Bagosora nta kimenyetso cyerekana ko yemeye kuryozwa ibyaha byamuhamye, kandi ko nta kimenyetso na kimwe kigaragaza ko yagaragaje yicujije, ahubwo ko umucamanza abona, ibyo Bagosora yatanze ari ingingo zigamije kugabanya uruhare rwe ku byaha yakoze mu 1994.

Tanga Igitekerezo