Abapolisi 140 basimbuye abari muri Santarafurika

Yanditswe na KT Radio Team January 15, 2020 - 13:16

Polisi y’u Rwanda yarangije gusimbuza abapolisi bayo bari bamaze umwaka mu butumwa bw’amahoro bw’Umuryango w’Abibumbye(UN) muri Repubulika ya Santre Afurika(CAR) kuri uyu wa gatatu.

Umuyobozi w’Umutwe, umwe muri itatu yagiye gusimbura abandi muri Santre Afurika, CSP Valens Muhabwa, avuga ko batojwe mu buryo buhagije ibijyanye no kurinda abakozi ba UN, abayobozi bakuru ba Santre Afurika hamwe n’inkambi z’abaturage.

Mu ikiganiro CSP Muhabwa yagiranye n’abanyamakuru mu gitondo cyo kuri uyu wa gatatu yasobanuye bimwe mu byo aba bapolisi bazaba bashinzwe aho muri Santre Afurika

Mu bapolisi 140 bagiye muri Santre Afurika harimo abagabo 130 n’abagore 10, bose bakazamara umwaka bakorera mu mujyi wa Bangui (umurwa mukuru wa CAR).

Polisi y’u Rwanda ifite imitwe itatu muri CAR igizwe n’abantu 420 batojwe ibijyanye no kugarura amahoro mu bice birimo umutekano muke, ndetse n’abandi 560 bari muri Sudani y’Epfo.