Perezida Kagame yasabye abarahira kutikanga mu gihe babajijwe inshingano biyemeje

Yanditswe na KT Radio Team June 1, 2020 - 19:18

President wa Republica y’u Rwanda kuri uyu wa mbere tariki 1 Kamena 2020, yakiriye indahiro z’abayobozi bashya muri guverinoma y’u Rwanda, aboneraho no gushimira abaturarwanda uko bakomeje kwitwara muri ibi bihe bidasanzwe.

Abayobozi barahiriye imbere y’umukuru w’igihugu barimo Umunyamabanga wa Leta muri Minisiteri y’Ububanyi n’Amahanga, Prof. Nshuti Manasseh n’Umunyamabanga wa Leta muri Minisiteri y’Ubuhinzi n’Ubworozi, Dr Ngabitsinze Jean-Chrysostome.

Abandi barahiye ni Emmanuel Kamere, Umucamanza mu Rukiko rw’Ubujurire, Geraldine Umugwaneza Umucamanza mu Rukiko rw’Ubujurire, Déogratias Minani Bizimana Umudepite mu nteko ishinga amategeko na Mukama Abbas, Umuvunyi Mukuru wungirije.

President Kagame yashimiye abarahiye ko bemeye gukomeza gukorera igihugu cyane cyane muri ibi bihe bigoye, abifuriza kuzasoza neza imirimo bashinzwe kandi bazirikana ko unyuranya n’ibyo yiyemeje agomba kubibazwa.