Zipline yatangiye gutanga serivisi amasaha 24/24

Yanditswe na KT Radio Team February 17, 2021 - 13:44

Ubuyobozi bw’Ikigo Zipline Rwanda gifite utudege tutagira abapilote, buratangaza ko bwatangiye gukora ingendo z’ijoro mu bikorwa byo gutwara imiti n’amaraso, bikaba bigiye gukorwa nyuma yo kubona icyangombwa kibemerera gukora nijoro.

Joseph Ndagijimana uyobora Zipline Rwanda, yabwiye KT Radio ko bari barasabye Ikigo cy’Igihugu gishinzwe indege za gisivire uburenganzira bwo gukora amasaha y’ijoro kuko hari amategeko abigenga.

Avuga ko icyemezo bakibonye mu cyumweru gishize kandi ibigo bya mbere bikaba byaratangiye kubona serivisi z’ijoro harimo ibitaro bya Byumba, Mugonero, Kibirizi na Kinazi.

Akomeza avuga ko ubu badafite imbogamizi z’amasaha mu kugeza serivisi ku bigo nderabuzima n’ibitaro.

Umuyobozi w’Ibitaro bya Ruhango, Dr Namanya William, avuga ko bishimiye serivisi za Zipline mu masaha y’ijoro.

Indege zitagira abapilote zizwi nka Drone, kuva 2016 zikorera mu Rwanda imirimo yo gutwara amaraso ku bigo nderabuzima n’ibitaro biyakeneye.

Ni uburyo bwihutisha igikorwa cyo kugeza amaraso aho akenewe, mu gihe mbere ryari ihurizo kuyageza ku kigo nderabuzima kiri mu misozi hari n’imihanda mibi, ubu mu minota mike umurwayi ashobora gutabarwa atagombye gutegereza iminsi n’amasaha nk’uko byahoze ubwo buryo butaragera mu Rwanda.

Drone zitwara imiti n’amaraso kugeza ubu zimaze gutwara amashahi ibihumbi 74 by’amaraso hamwe n’imiti irenge ibihumbi 26 mu myaka ine, zikaba zikorera ku bitaro n’ibigo nderabuzima 271 mu turere 25 dutandukanye tw’u Rwanda.

Tanga Igitekerezo