Perezida Kagame yakiriye Mushikiwabo na Charles Michel ku bijyanye no gukingira Covid-19

Yanditswe na KT Radio Team March 8, 2021 - 09:12

Ku cyumweru tariki 07 Werurwe 2021, Perezida wa Repubulika Paul Kagame yakiriye Umunyamabanga Mukuru w’Umuryango w’Ibihugu bikoresha Igifaransa (Francophonie), Louise Mushikiwabo, hamwe na Perezida w’Inama y’Umuryango w’Ubumwe bw’u Burayi, Charles Michel, bakaba baje gushyigikira u Rwanda ku bijyanye no gukingira Covid-19.

Aba bayobozi b’imiryango mpuzamahanga kandi bari kumwe n’umuganga akaba n’umudepite mu Nteko Ishinga Amategeko y’u Burayi, Chrysoula Zacharopoulou, bakaba barahise bajya ku kigo Nderabuzima cya Mayange mu karere ka Bugesera, kureba uko ibikorwa byo gukingira Covid-19 biri kugenda.

Muri urwo rugendo, bari baherekejwe na Minisitiri w’Ubuzima Dr Daniel Ngamije, ndetse na Minisitiri w’Ububanyi n’Amahanga, Dr Vincent Biruta.

Abo bayobozi bavuga ko basuye u Rwanda mu rwego rwo gushyigikira no gukorera ubuvugizi gahunda yo gutanga inkingo za COVID-19, zatanzwe n’Ishami ry’Umuryango w’Abibumbye ryita ku Buzima (OMS) muri gahunda yiswe Covax igamije kuzisaranganya hose ku isi.

Louise Mushikiwabo yavuze ko nka Francophonie badatanga inkingo, ariko ko kwihutisha iyi gahunda ari byo barimo kuko bifata igihe kinini cyane kugira ngo nkingo zigere mu bihugu bitandukanye.

Charles Michel na we yizeza ko azakangurira inganda zo kuri uwo mugabane gukora inkingo za Covid-19 nyinshi zizoherezwa muri Afurika mu gihe cya vuba.

Minisitiri w’Ubuzima, Dr Daniel Ngamije yasobanuye ko abo bayobozi beretswe uburyo ikoranabuhanga ririmo gufasha mu gukwirakwiza inkingo no kubika amakuru y’abakingirwa bose muri mudasobwa z’ibitaro n’ibigo nderabuzima birenga 550 mu gihugu hose.

Tanga Igitekerezo