Amajyepfo: Hari imirenge ishobora gushyirwa muri Guma Mu Rugo

Yanditswe na KT Radio Team April 6, 2021 - 10:40

Minisitiri w’Ubutegetsi bw’Igihugu, Jean Marie Vianney Gatabazi, arasaba abatuye mu Ntara y’Amajyepfo gukaza ingamba mu kwirinda icyorezo cya Covid-19, kuko ngo hatagize igihinduka hari uduce twashyirwa muri Gumamurugo.

Yabibwiye abaturage bahagarariye abandi mu Mirenge ya Ruheru, Nyabimata, Kivu na Muganza, ubwo yabagendereraga kuri uyu wa 5 Mata 2021.

Ubwo yaganiraga n’abo baturage, Minisitiri Gatabazi yabibukije ko imibare y’abandura Covid-19 ari myinshi cyane mu Ntara y’Amajyepfo muri iyi minsi, abasaba gukaza ingamba.

Yagarutse ku ngamba zo kwirinda Covid-19, avuga ko ubwo yajyaga i Nyaruguru yagiye abona abantu bagenda mu muhanda batambaye udupfukamunwa, aboneraho gusaba abayobozi b’inzego z’ibanze kongera kwibutsa abo abaturage amabwiriza yashyizweho  yo kuyirinda.

Yanababwiye ko Covid-19 ihari ko n’ikimenyimenyi ngo yayirwaye hafi iminsi 40 kandi ngo nta we yakwifuriza kuyirwara. Ikindi, ngo buri munsi hari abo ihitana.

Tugarutse ku mibare y’abanduye Coronavirus igenda yiyongera mu Ntara y’Amajyepfo, ubwo Minisitiri Gatabazi yaganiriraga abaturage bahagarariye abandi mu Karere ka Nyaruguru ejo ku wa Mbere, hari haraye hasohotse imibare igaragaza ko abantu 239 bashyashya bayanduye mu Rwanda, kandi ko 220 bose, ni ukuvuga 92%, bari abo mu turere two mu Ntara y’Amajyepfo.

Imibare yaraye isohotse kuri uyu wa mbere yo igaragaza ko habonetse abarwayi bashya 202 mu gihugu hose, ariko muri bo 173 ni ababonetse mu turere tw’Intara y’Amajyepfo.

Tanga Igitekerezo