Ikigo cy’igihugu cyita ku buzima (RBC), cyatangaje ko mu bushakashatsi giherutse gukora bwarangiye mu cyumweru gishize aho bapimye abantu Covid-19 batomboza, bwerekanye ko mu Mujyi wa Kigali abantu 12% banduye icyo cyorezo.

Ni ubushakashatsi bwakozwe hapimwa abantu 2,900 mu gihugu cyose, bukaba bwarerekanye ko iyo ndwara yongereye ubukana ku buryo budasanzwe.

Umuyobozi mukuru wa RBC, Dr Sabin Nsanzimana, avuga ko ubwandu bwa Covid-19 bwiyongereye cyane mu mpera z’umwaka ushize no mu ntangiriro z’uyu wa 2021, akabyerekana ahereye ku mibare y’ibipimo byagiye bikorwa.