Minisitiri Nduhungirehe yagaragaje ko u Bushinwa na Afurika byishimira umubano uhamye bisangiye

Minisitiri w’Ububanyi n’Amahanga n’Ubutwererane, Amb. Olivier Nduhungirehe yavuze ko u Bushinwa n’Umugabane wa Afurika byishimira umubano ukomeye kandi ushingiye ku byifuzo by’impande zombi.

Minisitiri Nduhungirehe yabigarutseho ubwo yitabiraga inama yo ku rwego rwa ba Minisitiri y’Ihuriro ku bufatanye bwa Afurika n’u Bushinwa (Forum on China-Africa Cooperation – FOCAC).

Mu ijambo rye, yashimye ubufatanye bw’Ubushinwa na Afurika mu nzego zitandukanye, ati: “U Bushinwa na Afurika byishimira umubano ukomeye kandi utajegajega, ushingiye ku byifuzo bisangiwe kandi bigaragarira mu bisubizo bifatika, bishingiye ku baturage. Ni nako bimeze ku mubano w’u Rwanda n’u Bushinwa, ukomeje gutera imbere binyuze mu bufatanye bufatika kandi bubyara umusaruro.”

Inama ya FOCAC iba igizwe n’inama z’abaminisitiri, ziba buri myaka itatu, ikabera muri Afurika no mu Bushinwa bisimburana. Iy’uyu mwaka irabera i Changsha mu Bushinwa.

Umubano wa Guverinoma y’u Rwanda n’u Bushinwa umaze imyaka irenga 50 ushinze imizi ndetse watanze umusaruro ufatika, ufitiye inyungu abaturage b’impande zombi.

Mu myaka 20, ni ukuvuga hagati ya 2003 na 2023, imishinga y’Abashinwa 118 ifite agaciro ka miliyoni 959,7$ yinjiye mu Rwanda, itanga akazi ku bantu 29.902.

Mu mwaka wa 2022, imishinga y’Abashinwa 49 ya miliyoni 182$ yinjiye mu Rwanda mu gihe rwo rwohereje mu Bushinwa ibicuruzwa bifite agaciro ka miliyoni 102$.