Lesotho ibaye igihugu cya nyuma Coronavirus igezemo muri Africa

Igihugu cya Lesotho kimaze kwemeza umuntu wa mbere wanduye coronavirus – kikaba kibaye icya nyuma igezemo ku mugabane w’Afurika.

Iki gihugu kigendera ku butegetsi bwa cyami, kizengurutswe uko cyakabaye n’Afurika y’epfo.

Afurika y’epfo yo ikaba imaze kwemeza abantu 11,350 banduye Covid-19, indwara y’ubuhumekero iterwa n’ubu bwoko bushya bwa coronavirus.

Uwo muntu umwe wanduye coronavirus watangajwe muri Lesotho yabonetse nyuma y’ibipimo byafashwe ku bagenzi 81.

Mu kiganiro yagiranye n’igitangazamakuru cyo muri Afurika y’epfo mu byumweru bicye bishize, Minisitiri w’imari wa Lesotho, Moeketsi Majoro, yasabye ko abashaka gutaha bavuye muri Afurika y’epfo bakwihangana bakaba bahagumye, atinya ko binjirana ubwandu.

Kubera ko Lesotho nta bushobozi bwa ngombwa bwo gupima Covid-19, ibizamini byoherezwa muri Afurika y’epfo gusuzumirwayo mu kigo cy’igihugu cyo kurwanya indwara zandura.

Ministere y’ubuzima ikaba yatangaje ko Kugeza ubu bamaze kohereza ibizamini by’abantu 597 gupimwa muri Afrika y’epfo, 295 muri bo ntayo banduye, naho muri 301 haracyategerejwe ibisubizo.