Perezida Kagame na madamu Jeannette Kagame babaruwe mu ibarura rusange rya gatanu

PerezidaPaul Kagame na Madamu Jeannette Kagame kuri uyu wa Kabiri taliki 16 Kanama 2022, babaruwe mu gikorwa cy’Ibarura rusange rya gatanu ry’abaturage n’imiturire cyatangijwe n’Ikigo cy’igihugu gishinzwe ibarurishamibare (NISR).

Amakuru y’ibarura ku muryango w’Umukuru w’Igihugu yanditswe na Yusuf Murangwa, Umuyobozi mukuru wa NISR.

Ijoro rya tariki ya 15 rishyira tariki ya 16 Kanama 2022 ni ryo fatizo ry’ibarura rusange aho abaturage basabwa kumenya amakuru y’abazaba baraye mu rugo barimo abasanzwe barubamo, abashyitsi ndetse n’usanzwe ahaba ataharaye ku mpamvu zitandukanye.

Harimo kandi no kubabaza ibiranga urugo cyangwa aho ruherereye, imiterere ya buri muntu mu bagize urugo imyaka yabo n’igitsina, imyirondoro, irangamimerere n’amashuri bize, indimi bavuga, imirimo bakora, no kumenya bafite cyangwa badafite ubumuga. 

Ababarura bazabaza kandi ibijyanye n’ubuzima birimo imfu zabaye mu rugo mu mezi 12 abanziriza ijoro ry’ibarura, bakazabaza kandi n’ibirebana n’imbyaro bibazwa igitsinagore guhera ku bafite imyaka 10 y’amavuko.

Abakarani b’ibarura  babaza ibijyanye n’imiturire, ubuhinzi n’ubworozi, ibindi ni ibyubatse inkuta z’inzu, ibishashe hasi, ibiyisakaye, umubare w’ibyumba, ibikoresho biramba biri mu rugo, isuku n’isukura ndetse n’ibicanwa.

Ibibazo byose bizabazwa abaturage bizashingira kuri iryo joro bakaba basabwa kumenya ayo makuru. Ndetse bizafasha mu kumenya amakuru azifashishwa mu gutegura igenamigambi ry’igihugu.

Mu Rwanda hakozwe uduce tw’ibarura 24339 tuzakorwamo n’abakarani b’ibarura rusange bagera ku bihumbi 27.Iri barura rizatwara ingengo y’imari ya miliyari 30 Frw.