Icyizere cyo kubaho ku banyarwanda cyariyongereye kigera ku myaka 69

Raporo y’Ishami ry’Umuryango w’Abibumbye ryita ku buzima, yo muri uyu mwaka yashyize u Rwanda ku mwanya wa 11 mu kugira abaturage bafite icyizere cyo kubaho kiri hejuru mu Afurika. Kiva kunmyaka 67 kigera ku 69.

Bamwe mu baturage b’ingeri zitandukanye ndetse n’impuguke mu iterambere ry’ubukungu n’imibereho myiza, bavuga ko ibi bishingiye ku miyoborere myiza.

Impuguke mu buzima n’imibereho y’abaturage, Mporanyi Theobald, aganira na RBA, yavuze ko ubukungu bw’igihugu n’ubw’abantu ku giti cyabo, iterambere ry’uburezi, ubuzima n’imibereho myiza y’abaturage ari bimwe mu bituma icyizere cyo kubaho cyiyongera.

Yavuze kandi ko ikigereranyo rusange cy’imyaka abanyarwanda bamara gishobora kuzakomeza kwiyongera, ariko buri muturage asabwa kubigiramo uruhare ategura neza ejo hazaza.

Ubushakashatsi bwashyizwe ahagaragara na OMS muri uku kwezi bugaragaza ko u Rwanda ruza ku mwanya wa 11 mu kugira abaturage bafite icyizere cyo kubaho kiri hejuru, mu bihugu 54 bigize umugabane wa Afurika.

Ikigereranyo cy’imyaka y’uburame ku banyarwanda kigeze ku myaka 69 ivuye ku myaka 67 umunyarwanda yabarirwaga umwaka ushize wa 2021.

Mu ntangiriro za Kanama, Ishami ry’Umuryango w’Abibumbye ryita ku Buzima (OMS) ryashimye ibihugu by’Afurika ku iterambere ryagaragaye mu mibereho yabyo hagati ya 2000 na 2019.

Raporo nshya yakozwe na OMS yavuze ko ikigereranyo cyo kubaho muri Afurika cyiyongereye kiva ku myaka 46 kigera ku myaka 56, bivuze ko hiyongereyeho imyaka 10.

Algeria, Morocco, Cabo Verde, Tunisia n’ibirwa bya Maurice nibyo bihugu biza imbere ku mugabane wa Afurika mu kugira abaturage bafite icyizere cyo kubaho kiri hejuru.