Perezida Kagame yakiranywe urugwiro n’ibyishimo bidasanzwe ageze i Nyabugogo

Perezida Paul Kagame ku mugoroba wo kuri iki cyumweru yagaragarijwe ibyishimo n’urugwiro bidasanzwe n’abaturage yasanze i Nyabugogo mu Mujyi wa Kigali, ubwo yagarukaga avuye mu ruzinduko yagiriraga mu Ntara y’Amajyepfo n’Iy’Uburengerazuba.

Perezida yageze Nyabugogo mu buryo bwatunguye Abaturage maze ava mu modoka asuhuza abari aho bose bari benshi bakikije imihanda.

Aya mashusho yashyizwe kuribuga rwa Twitter na Stephanie Nyombayire, Umunyamabanga ushinzwe itangazamakuru mu biro by’Umukuru.

Aya mashusho yayakurikije amagambo agira ati: “Mu buryo butunguranye, Perezida Kagame yahagaze Nyabugogo asuhuza Abaturage, ubwo yarimo agaruka avuye mu ruzinduko rw’iminsi ine, rugamije kwegera abaturage.”

Perezida yazengurutse ibice bitandukanye bya Nyabugogo, harimo kuri gare ndetse no ku isoko ry’abahoze ari abazunguzayi, aho abaturage bamugaragarije ibyishimo n’urugwiro byo kumwakira.

Perezida Kagame yageze Nyabugogo mu Mujyi wa Kigali, nyuma y’aho yari avuye mu Karere ka Karongi mu Ntara y’Iburengerazuba, aho yasuye uruganda rw’icyayi rwa Rugabano. Bikaba byari biri kuri gahunda zigize uruzinduko rw’iminsi ine yagiriye mu Ntara y’Amajyepfo n’iy’Uburengerazuba.

Uruzinduko rw’Umukuru w’Igihugu rwari rugamije kurushaho kwegera, kumenya ibibazo abaturage bafite ndetse bigafashwa kubikemura no guhabwa umurongo.