Umwamikazi w’u Bwongereza yakiriye Liz Truss nka Minisitiri w’intebe mushya

Liz Truss yatangiye inshingano ze nka Minisitiri w’Intebe w’u Bwongereza nyuma yo kubonana n’Umwamikazi w’u Bwongereza nk’uko bisanzwe mbere yo gutangira inshingano.

Byitezwe ko ahita atangaza abagize Guverinoma ye mbere y’inama izabahuza ku munsi w’ejo.

Ishyaka ry’abaharanira impinduka (Conservative) mu Bwongereza, ku wa mbere tariki 05 Nzeri 2022 nibwo ryatoye Liz Truss nk’umuyobozi waryo, asimbuye Boris Johnson, bituma agomba no kuba Minisitiri w’Intebe w’iki gihugu.

Liz Truss w’imyaka 47 yatsinze Rishi Sunak bari bahanganye ku majwi 81,326 mu gihe Sunak yagize amajwi 60,399. Iyi ntsinzi ije nyuma y’ibyumweru byinshi aba bombi bahataniye uyu mwanya.

Madamu Liz ateye ikirenge mu cya Margaret Thatcher na Theresa May, nk’umugore wa gatatu ubaye Minisitiri w’intebe w’u Bwongereza.

Liz Truss abaye Minisitiri w’Intebe wa kane wo mu ishyaka rye kuva mu 2015.