Abayobozi babiri bakuru muri Cogebanque bari mu maboko y’ubugenzacyaha

Urwego rw’Igihugu rw’Ubugenzacyaha (RIB), rwatanze dosiye y’urubanza ku bayobozi babiri bakuru muri Cogebanque, batawe muri yombi ku ya 1 Nzeri bakekwaho gukoresha nabi umutungo ufitiye rubanda akamaro.

Aba bayobozi batawe muri yombi ni Joel Kayonga, umuyobozi mukuru ushinzwe ubucuruzi, na George Ndinzihiwe wari ushinzwe inguzanyo muri Cogebanque.

Umuvugizi wa RIB, Thierry Murangira, ku wa kabiri, tariki ya 6 Nzeri, yatangarije the New Times ko amadosiye y’aba bakekwa bombi yashyikirijwe ubushinjacyaha.

Ntabwo amakuru arambuye kuri uru rubanza yashyizwe ahagaragara, gusa aba bayobozi bafungiye kuri sitasiyo ya RIB ya Remera mu Karere ka Gasabo.

Biteganijwe ko Ubushinjacyaha buzasuzuma dosiye mbere yo gufata icyemezo cy’uko aba bakekwa bagezwa imbere y’urukiko.

Icyaha cyo gukoresha nabi umutungo ufitiye rubanda akamaro gihanwa n’ingingo ya 12 y’itegeko ryerekeye gukumira ruswa.

Ukekwaho icyaha iyo abihamijwe n’urukiko, ahanishwa igifungo kirenze imyaka itanu ariko kitarenze imyaka irindwi n’ihazabu y’amafaranga y’u Rwanda atari munsi ya miliyoni eshatu ariko atarenze miliyoni eshanu.