Urukiko rwagize abere Abanyamakuru ba Shene ya YouTube Iwacu TV, rusaba ko bahita barekurwa

Urukiko rukuru ku wa gatatu tariki 05 Ukwakira, rwasabye ko Abanyamakuru batatu bakoreraga shene ya YouTube yitwa Iwacu TV, barekurwa nyuma yo gusanga badahamwa n’ibyaha baregwaga.

Abo banyamakuru batatu barimo: Jean Damascene Mutuyimana, Shadrack Niyonsenga, na Jean Baptiste Nshimiyima bari bafunzwe kuva mu 2018.

Bashinjwaga ibyaha birimo gukwirakwiza impuha zigamije kwangisha u Rwanda mu bihugu by’amahanga, gutangaza amakuru agamije guteza imvururu.

Aba banyamakuru bashinjwaga gutangaza inkuru z’ibinyoma zivuga ko mu ishyamba rya Nyungwe hari inyeshyamba zitwaje intwaro, mu gihe nyamara nta nzego izo arizo zose za leta zabyemeje.

Ubushinjacyaha bw’u Rwanda bwari bwarabasabiye igihano cy’igifungo cy’imyaka 22 kubera ibyaha bakekwaho.

Nyuma yo gusuzuma ibimenyetso muri uru rubanza, urukiko rwemeje ko nta bimenyetso bifatika bituma bakomeza gufungwa muri gereza bityo rutegeka ko bahita barekurwa.