Elon musk umuherwe wa mbere ku isi yamaze kugura Twitter kuri miliyari $44

Umugabo wa mbere ukize cyane ku isi, Elon Musk, yamaze kugura kompanyi y’urubuga nkoranyambaga rwa Twitter kuri miliyari 44 z’amadolari y’Amerika.

Ibyo kugurwa Kwa Twitter n’uyu usanzwe ari nyiri kamani ya Tesla, byatangajwe n’ibitangazamakuru byo muri Amerika ndetse n’umushoramari muri Twitter, biza kwemezwa na nyir’ubwite.

Elon Musk yanditse kuri Twitter ubutumwa bugira Buti: “inyoni irekuwe”, mu bishatse kuvuga ko amasezerano y’ubugure yasojwe.

Abayobozi bamwe bo ku rwego rwo hejuru muri Twitter, barimo n’umukuru w’iyi kompanyi Parag Agrawal, amakuru avuga ko birukanwe.

Ibi bisoje ikibazo cyari kimaze amezi cyari cyaratumye Twitter ijya mu rukiko ishaka ko uyu muherwe utunze za miliyari z’amadolari akurikiza amasezerano y’ubugure yari yagerageje kwikuramo.

Kuwa 4 Ukwakira Musk yemeye ko azakomeza umugambi wo kugura Twitter, urukiko rwa Delaware rumuha itariki ya 28 Ukwakira nka nyirantarengwa yo kuba yamaze kugura uru rubuga nkoranyambaga rukunzwe cyane ku Isi.