Muri Tanzaniya indege yari itwaye abantu 43 yaguye mu kiyaga cya Victoria ku cyumweru, aho abagera kuri 19 baguye muri iyo mpanuka nk’uko byemejwe n’inzego z’ubuyobozi.
Kugeza ubu bivugwa ko impamvu nyamukuru yateye iyi mpanuka ari ikirere cyari kimeze nabi.
Iyo ndege y’ikompanyi ya Perecision Air yaguye mu mazi ishigaje metero 100 ngo igere ku kibuga nkuko umuyobozi wa polisi mu karere, William Mwampaghale yabibwiye abanyamakuru ku kibuga cy’indege cya Bukoba.
Komiseri w’akarere, Albert Chalamila we yavuze ko abantu 43 barimo abagenzi 39 abapilote babiri n’abakozi bo mu ndege babiri bari muri iyi ndege yari mu rugendo numero PW 494 ivuye mu murwa mukuru Dar es Salaam yerekeza Bukoba.
Amashusho yagaragaye ku bitangazamakuru byo muri Tanzaniya yerekanye igice kinini cy’iyo ndege cyaguye mu mazi abatabazi barimo abarobyi barimo kurohora abantu babatwara imusozi. Abandi bakozi bo mu butabazi bageragezaga guterura indege bakoresheje imigozi n’imashini ziterura imizigo.
Precision Air ni yo kompanyi y’indege nini kurusha izindi mu z’abikorera ku giti cyabo muri Tanzaniya. Iyi mpanuka ikimara kuba iyi kompanyi yasohoye itangazo ryemeza ko iyo mpanuka yabaye.
Perezida Samia Suluhu Hassan yatanze ubutumwa bw’akababaro ku bari bafite abantu muri iyo ndege.
Kugeza ubu Minisitiri w’Intebe wa Tanzania, Kassim Majaliwa yamaze kugera i Bukoba mu rwego rwo kwifatanya n’abaturage mu mihango yo gusezera ku bitabye Imana irabera muri Kaitaba Stadium kuva 11h00.
Muri uyu muhango, Minisitiri w’Intebe Kassim Majaliwa araba ahagarariye Perezida Samia Suluhu Hassan uri mu ruzindiko rw’akazi mu Bushinwa.
Post comments (0)