Umuhanda wa Rugunga wafunzwe kubera imvura

Polisi y’Igihugu iratangaza ko imvura yaguye ku mugoroba wo ku wa gatatu yateje amazi menshi mu mihanda ya Kigali, bigatuma imwe ifungwa by’igihe gito, indi ikaba igifunze.

Iyo mihanda yafunzwe by’igihe gito ni umuhanda wa Kimisagara, ariko nyuma ukaba waje gufungurwa hamwe n’uwa Rwandex wafunzwe ariko bakomeza gukurikiranira hafi uko wakongera kuba nyabagendwa. Umuhanda wa Rugunga wo wakomeje gufungwa, aho Polisi y’Igihugu yasabye abasanzwe bawukoresha kunyura izindi nzira kuko wo utakiri nyabagendwa.

Mu kiganiro kigufi Umuvugizi wa Polisi, CP John Bosco Kabera, yagiranye na Radio Rwanda, yasabye abakoresha imihanda kwigengesera no kumvira ibyo abapolisi bababwira, anongeraho ko abakoresha imihanda iri mu bibaya bakwiye kuyirinda kuko mu gihe cy’imvura amazi yose ari ho yerekeza.

Yanaboneyeho kandi kubwira Abanyarwanda muri rusange ko mu gihe babona umuhanda urimo amazi bakwirinda kuyishoramo kuko afite imbaraga, dore ko ku Kimisagara mu Karere ka Nyarugenge yatwaye umumotari arapfa, ni nyuma yo gushaka kuramira moto ye yari atembanye.