Nigeria: Abashinwa 7 bari bamaze igihe barashimuswe Babohojwe

Abayobozi muri Nigeria bavuze ko abashinwa barindwi bari barashimuswe ubu bari kwitabwaho n’abaganga nyuma y’amezi hafi atandatu bari mu biganza by’ababashimuse.

Abasirikare ba Nijeriya mu mpera z’icyumweru gishize nibwo bababohoje muri reta ya Kaduna, rwagati muri Nigeria.

Umuvugizi w’igisirikare kirwanira mu kirere, Gabriel Gabkwet, yavuze ko abo bashinwa bakuwe mu turere twa Kanfani Doka na Gwaska muri iyo reta, mu gitero cyakozwe mu ijoro. Yavuze ko abari barabashimuse babataye, banasiga n’intwaro zabo. Bari babamaranye amezi arenga atandatu. Babashimuse babavanye mu kirombe cya Shiroror, bacukuragamwo ubutare.

Ubwo abo bashinwa bashimutwaga mu kwezi kwa gatandatu, abashinzwe umutekano 22 barimo umuporisi hamwe n’umusirikare bahasize ubuzima.

Nigeria imaze imyaka irenga 13 irwanya Boko Haram hamwe n’iyindi mitwe y’iterabwoba mu Majyaruguru ashyira uburasirazuba bw’igihugu. Abantu hafi 300,000 bamaze kwicwa muri ibyo bitero.

Abayobozi bavuga ko barimo kandi gukora ibishoboka kugirango bahagarike ingeso y’ubunyamaswa yo gushimuta abantu bagamije kubabyaza amafaranga mu zindi ntara z’igihugu.