Gicumbi: Umugore akurikiranyweho kwica umwana we amunigishije umugozi

Ubushinjacyaha ku rwego Rwisumbuye bwa Gicumbi bwakiriye dosiye iregwamo umugore w’imyaka 31 y’amavuko, ukurikiranyweho icyaha cyo kwica umwana yibyariye w’amezi atanu amunigishije umugozi.

Uyu mugore atuye mu Karere ka Gicumbi, Umurenge wa Ruvune, Akagari ka Gashirira, Umudugudu wa Rugerero, ari naho yakoreye icyaha tariki 16/02/2023.

Ubushinjacyaha bugaragaza ko uyu mugore yahengereye umugabo we agiye guhinga agahita afata umwana akamuniga akoresheje umugozi yabona amaze gupfa akamujyana mu buriri akamuryamisha.

Icyo cyaha cyaje  kumenyekana ubwo umugabo yahamagaraga umugore kuri Telephone akamubaza niba yamaze gutunganya amafunguro ngo agende basangire, umugore akihutira kumubwira ko yishe umwana, umugabo agahita yiruka ajya mu rugo agasanga koko yamaze kumwica maze yitabaza inzego zibishinzwe, umugore ashyikirizwa Ubutabera.

Icyaha nikimuhama azahanishwa ingingo ya 108 y’itegeko no Nº68/2018 ryo ku wa 30/08/2018 riteganya ibyaha n’ibihano muri rusange. Icyaha iyo agihamijwe n’urukiko ahanishwa igifungo kitari munsi y’imyaka itanu ariko kitarenze imyaka irindwi .