Drone ya Amerika yagonzwe n’indege y’intambara y’u Burusiya

Igisirikare cya leta zunze ubumwe za Amerika cyatangaje ko indege y’intambara y’u Burusiya yagonganye na drone ya Amerika hejuru y’Inyanja y’Umukara.

Ibi ababikurikirania hafi bavuga ko bishobora kongera umwuka mubi w’ubushyamirane hagati y’u Burusiya na Leta Zunze Ubumwe za Amerika kubera intambara yo muri Ukraine.

Amerika ivuga ko iyo drone yari mu kazi kayo ka buri munsi mu kirere mpuzamahanga gisanzwe kigenzurwa na NATO, maze indege ebyiri z’intambara z’u Burusiya zagerageza kuyitangira.

Umuvugizi wa perezidanse ya Amerika, White House, John Kirby yavuze ko niba u Burusiya bwarabikoze bugamije ko Amerika igiye gukura indege zayo muri icyo kirere bitazaba.

U Burusiya buvuga ko iyi drone yakoze impanuka ubwo yageragezaga gukwepa ikoranabuhanga rituma hamenyekana aho indege igeze kandi ko izo ndege zitigeze ziyikoranaho.

Amerika yahise ihamagaza ambasaderi w’u Burusiya i Washington, Anatoly Antonov, kugirango asobanure ibyabaye.

U Burusiya bwatangaje ko ibyabaye kuri iyo drone ibifata nk’agasomborotso.