Minisitiri w’Intebe Dr Ngirente yakiriye Umuyobozi wa ILO

Ku wa Kane Minisitiri w’Intebe Dr. Edouard Ngirente yagiranye ibiganiro na Cynthia Samuel -Olonjuwon, Umuyobozi wungirije w’umuryango mpuzamahanga w’umurimo ku rwego rw’isi akaba n’umuyobozi mukuru w’uwo muryango ku rwego rwa Afurika.

Cynthia Samuel -Olonjuwon ari mu Rwanda aho yitabiriye inama ya 19 y’umuryango Mpuzamahanga w’umurimo. Ibiganiro yagiranye na Minisitiri w’Intebe Dr. Edouard Ngirente byibanze ku birebana n’ubufatanye mu guteza imbere ubumenyi no guhanga imirimo. Aho yashimangiye ko ari inyungu ku baturage b’ibihugu birimo n’u Rwanda kubona imirimo yo gukora.

Cynthia Samuel Olonjun Kandi yihanganishije u Rwanda nyuma y’ibiza bikomeye byabaye mu Ntara y’Amajyaruguru n’iy’Iburengerazuba bigahitana ubuzima bw’abantu kandi bikangiza byinshi, avuga ko umuryango ayobora uzafasha u Rwanda aho bishoboka.

Yashimye uburyo u Rwanda rwateguye ndetse rukakira neza inama ya 19 y’Umuryango Mpuzamahanga w’umurimo yagize ubwitabire bwo ku rwego rwo hejuru.