Uganda: Perezida Museveni yaciye imyenda ya caguwa

Perezida Yoweri Museveni wa Uganda yaciye imyenda ya caguwa mu gihugu, avuga ko izitira iterambere ry’inganda z’imyenda kandi ko iyo myenda yambawe n’abantu bo mu burengerazuba bw’isi bitabye Imana.

Nk’uko bimeze mu bihugu hafi ya byose by’Afurika, Uganda yatumizaga imyenda myinshi ya caguwa, usanga ikundwa n’abantu benshi kubera ko ihendutse. Ariko abakora imyenda mu gihugu, binubira ko imyenda ishaje yuzuye ku masoko, bigatuma ubushobozi bw’inganda za Uganda bwo gukora imyenda, bugabanuka.

Byibura 70 kw’ijana by’imyenda ihabwa imiryango itanga imfashanyo mu Burayi n’Amerika, birangira igeze ku mugabane w’Afurika, nk’uko umuryango ufasha, wo mu Bwongereza, Oxfam, ubivuga.

Perezida Museveni, ari mu mujyi wa Mbale, ashyira ibuye rya mbere ahazubakwa inganda icyenda hazwi nka Sino-Uganda Mbale Industrial Park, yavuze ko mu gihugu hari abantu bafite ubushobozi bwo gukora imyenda ariko bahura uburyo yinjira ku isoko.

Umuryango w’Afurika y’uburasirazuba, Uganda nayo irimo, mu 2016 wemeranyijwe guca caguwa bitarenze 2019. Kugeza ubu, u Rwanda ni cyo gihugu cyonyine cyabyubahirije.