General (Rtd) James Kabarebe yarahiriye kujya mu Nteko ya EALA

Umunyamabanga wa Leta ushinzwe Ubutwererane bw’Akarere muri Minisiteri y’Ububanyi n’Amahanga (MINAFFET), General (Rtd) James Kabarebe, yarahiriye kwinjira mu Nteko y’Umuryango wa Afurika y’Iburasirazuba (EALA).

Uyu muhango wabaye kuwa 3 Ukwakira 2023, Gen Kabarebe arahirira imbere y’Inteko Rusange kwinjira muri EALA ndetse yiyemeza gukorana n’Inteko ya EALA mu guteza imbere yayo ndetse n’inyungu z’Umuryango ku nyungu z’abaturage ba EAC.

Ubusanzwe Inteko Ishinga Amategeko igirwa n’Abadepite icyenda batorwa guhagararira igihugu kinyamuryango, abaminisitiri bashinzwe ubutwererane bw’Akarere muri buri gihugu, Umunyamabanga Mukuru ndetse n’Umujyanama.

U Rwanda rusanzwe ruhagarariwe n’abadepite icyenda mu Nteko Ishinga Amategeko y’Umuryango wa Afurika y’Iburasirazuba (EALA).

Abo barimo Fatuma Nyirakobwa Ndangiza, Kayonga Caroline Rwivanga, Harebamungu Mathias, Musangabatware Clement, Nyiramana Aisha, Rutazana Francine, Uwumukiza Françoise na Iradukunda Alodie.

Ku ya 27 Nzeri 2023, ni bwo Gen (Rtd) Kabarebe yagizwe Umunyamabanga wa Leta ushinzwe Ubutwererane bw’Akarere muri Minisiteri y’Ububanyi n’Amahanga.

Ku ya 30 Kanama 2023, Gen (Rtd) Kabarebe wari usanzwe ari Umujyanama wa Perezida wa Repubulika mu by’Umutekano, nibwo yashyizwe mu kiruhuko cy’izabukuru.