Niger: Nta kompanyi y’Indege yemerewe kuzana Abafaransa mu Gihugu

Kompanyi z’indege zikorera ingendo muri Niger zatangaje ko zahawe amabwiriza yo kutagira Umufaransa zizana muri icyo gihugu.

Umubano hagati y’ibi bihugu ukomeje kuba mubi kuva muri Niger hajyaho ubutegetsi bwa gisirikari nyuma ya kudeta yabaye umwaka ushize.

Ibaruwa yandikiwe abakozi ba kompanyi Air Burkina, AFP ifitiye kopi ivuga ko bategetswe ko nta mufaransa wemerewe kwinjira ku butaka bwa Niger.

Iyo barwa ikomeza igira iti: “Kubera iyo mpamvu, ntibemewe kurira indege zacu.”

Kompanyi ya Maroc, Royal Air Maroc, nayo yatangaje ko izakurikiza ayo mabwiriza kugeza igihe hagize igihindutse cyangwa bahawe uruhushya rudasanzwe rubaha uburenganzira bwo gutwara Abafaransa baza muri Niger.

Izindi kompanyi zikora ingendo mu mujyi wa Niamey, zirimo Ethiopian Airlines, Air Tunisie na Turkish Airlines ntacyo ziratangaza kuri icyo cyemezo.

Nta ni cyo ubutegetsi muri Niger buratangaza niba koko Abafaransa baraciwe muri icyo gihugu.

Intandaro y’umwuka mubi hagati y’ibihugu byahoze ari inshuti z’akadasohoka ni kudeta yakuye ku butegetsi Prezida Mohamed Bazoum, umwaka ushize.

Ubufaransa bwafunze ambasade yabwo muri icyo gihugu nyuma y’uko Ambasaderi wayo Sylvain Itte ategetswe kuva mu gihugu.