USA: Ministri w’Ingabo ntazitabira Inama ya OTAN kubera uburwayi

Minisitri w’ingabo w’Amerika Lloyd Austin yasubitse urugendo yagombaga kugirira mu Bubiligi mu biganiro by’umuryango wo gutabarana hagati y’ibihugu by’Uburayi n’Amerika (OTAN).

Byatangajwe na ministeri y’ingabo y’Amerika ku wa mbere nyuma y’uko Lloyd Austin asubiye mu bitaro ku nshuro ya kabiri muri uyu mwaka.

Uyu mugabo ufite imyaka 70, ku cyumweru yajyanywe ku bitaro bya gisirikare byitwa Walter Reed nyuma yo kugaragaza ibimenyetso by’uburwayi bw’uruhago.

Ku wa mbere yavuwe mu buryo butamusaba kubagwa ariko abanza guterwa ikinya mu mubiri kugira ngo ikibazo cy’uruhago rwe kivurwe nkuko bitangazwa n’ibitaro byamwakiriye.

Major Gen. Patric Ryder wo mu gisirikare kirwanira mu kirere akaba umuvugizi wa ministeri y’ingabo y’Amerika ni we watangarije abanyamakuru ko Minisitiri Lloyd Austin atacyitabiriye inama ya OTAN izabera mu Bubiligi.

Ministeri y’ingabo y’Amerika ntiyatangaje niba ikibazo Austin afite ari uburwayi bw’uruhago cyangwa haravutse ikindi gishingiye ku kubagwa kubera uburwayi bwa kanseri y’udusabo tw’ubugabo.