U Burayi bwahaye Ukraine inkunga mu bya gisirikare ya miliyari $5.48

Ibihugu byo mu muryango w’Ubumwe bw’Uburayi byemereye Ukraine inkunga mu bya gisirikare ingana n’amadolari y’Amerika miliyari 5.48, mu rwego rwo kongerera imbaraga iki gihugu mu ntambara kirwana n’u Burusiya.

Ba ambasaderi b’ibihugu 27 bigize uyu muryango bemeye kuvugurura ikigega cyagenewe kubumbatira amahoro ku mugabane w’Uburayi. Ni mu nama yabereye mu Bubiligi nyuma y’amezi y’impaka za bimwe mu bihugu bikomeye muri uyu muryango harimo u Bufaransa n’u Budage.

Josep Borrell ushinzwe ububanyi n’amahanga mu muryango w’Ubumwe bw’Uburayi yanditse ku rubuga rwa X ko uko byagenda kose u Burayi buzakomeza gutera Ukraine inkunga.

Ubusanzwe iki kigega gisubiza igihugu cyo ku mugabane w’u Burayi amafaranga cyatanzeho inkunga ahandi.

U Bufaransa bwari bwagaragaje ko ibi bishobora kubahirizwa gusa mu gihe hubahirijwe ihame ryo kugura intwaro zakorewe ku mugabane w’u Burayi ariko ibindi bihugu bigaragaza impungenge z’uko bishobora gutuma ibikoresho bya gisirikare bitinda kuboneka kandi mu gihe bikenewe cyane ku rugamba Ukraine irwana n’u Burusiya.