U Rwanda n’ubwami bwa Maroc byiyemeje gushimangira ubufatanye mu bya gisirikare

Minisitiri w’Ingabo, Juvenal Marizamunda ari mu ruzinduko rw’akazi rw’iminsi itatu mu Bwami bwa Maroc rugamije gushimangira ubufatanye mu bya gisirikare hagati y’ibihugu byombi.

Minisitiri Marizamunda, mu ruzinduko yatangiye ku wa 18 Kamena 2025, yari aherekejwe na Shakilla Umutoni, Ambasaderi w’u Rwanda mu Bwami bwa Maroc, Col David Mutayomba, Umuyobozi Mukuru ushinzwe Amasomo ya Gisirikare n’Uburezi muri rusange, ndetse n’Umuyobozi ushinzwe isesengura mu nzego z’ubutasi, Lt Col Angeline Kamanzi.

Uru ruzinduko rwatangijwe n’umuhango wo gushyira indabo ku mva ya Mohammed V, mu guha icyubahiro umurage we w’amateka ndetse n’ubuyobozi bwamuranze no kuba ariwe waharaniye ubwigenge bwa Maroc.

Ku munsi wa mbere w’uru ruzinduko impande zombi zagiranye ibiganiro byo ku rwego rwo hejuru biyoborwa na Abdeltif Loudyi, wari uhagarariye Guverinoma ya Maroc. Ibi biganiro byabereye ku cyicaro gikuru cy’Ingabo, byibanze ku gushimangira ubufatanye hagati y’igisirikare cy’u Rwanda na Maroc.

Ibiganiro byasojwe no gushyira umukono ku mugaragaro amasezerano y’ubufatanye hagati y’Ingabo z’Ibihugu byombi hagati ya guverinoma yu Rwanda n’ubwami bwa Maroc.

Uru ruzinduko rugaragaza intambwe ikomeye mu mibanire mu bya gisirikare hagati y’u Rwanda na Maroc ndetse bikaba bigaragaza ko ibihugu byombi byiyemeje guharanira amahoro, umutekano, n’iterambere.