Minisitiri Dr Ngirente yagiranye ibiganiro na Perezida wa Somalia

Minisitiri w’Intebe Dr. Ngirente yagiranye ibiganiro na Hassan Sheikh Mohamud, Perezida wa Somaliya witabiriye Inama ya 22 isanzwe y’Abakuru b’Ibihugu bigize Umuryango w’Ibihugu bya Afurika y’Iburasirazuba.

Ibiganiro hagati y’abayozi bombi byabaye ku wa gatanu tariki 22 Nyakanga, ku munsi wa nyuma w’inama y’abakuru b’ibihugu.

Perezida wa Somalia Hassan Sheikh Mohamud, ni we mushyitsi w’icyubahiro witabiriye umwiherero w’abakuru b’ibihugu bya EAC.

Mu gitondo cyo kuri uwo munsi, Minisitiri w’Intebe Dr. Edouard Ngirente yifatanyije n’Abakuru b’Ibihugu bo muri EAC mu gikorwa cyo gutaha umuhanda uhuza Arusha na Namanga.

Uyu muhanda wa kaburimbo w’ibilometero 42.4 wiswe Arusha Bypass, ukaba uturuka ahitwa Ngaramtoni, ugahurira n’umuhanda wa Dodoma ahitwa Kisongo ugakomeza werekeza ahitwa Usa.

Ni umuhanda witezweho kunganira uwari usanzwe ukoreshwa cyane wa Moshi – Arusha ukazoroshya urujya n’uruza rw’abantu n’ibicuruzwa biva ku cyambu cya Mombasa byerekeza mu muhora wo hagati bihingukiye ahitwa Singida.

Ku wa Kane taliki ya 21 Nyakanga, ni bwo Minisitiri w’intebe Dr. Edouard Ngirente yitabiriye umwiherero wo hejuru w’Abakuru b’Ibihugu bya EAC ku Isoko Rusange ry’uyu Muryango, ahagarariye Perezida wa Repubulika Paul Kagame.