U Rwanda na DRC byemeranyije gukomeza ibiganiro ku gukemura umwuka mubi

U Rwanda na Repubulika Iharanira Demokarasi ya Kongo (DRC) bumvikanye kubgukomeza ibiganiro mu rwego rwo gukemura amakimbirane ashingiye kuri politiki hagati y’ibihugu byombi.

Aya masezerano yemeranyijweho ku wa gatandatu tariki 05 Ugushyingo, hagati ya Minisitiri w’ububanyi n’amahanga w’u Rwanda, Dr Vincent Biruta na mugenzi we wa DRC, Christophe Lutundula, mu biganiro byabereye i Luanda, muri Angola nk’igihugu gisanzwe ari umuhuza mu bibazo by’u Rwanda na RDC.

Nk’uko imyanzuro yavuye muri ibyo biganiro ibivuga, aba baminisitiri bemeye “gukomeza ibiganiro bya politiki hagati y’abayobozi ba Repubulika ya Demokarasi ya Congo na Repubulika y’u Rwanda, mu rwego rwo gukemura ikibazo cy’umwuka mubi uri hagati y’ibihugu byombi by’abaturanyi.”

Iki cyemezo kibaye nyuma y’iminsi ibihugu byombi bishinjana kugira uruhare rw’umutekano muke ukomeje guterwa n’umutwe w’inyeshyamba M23 mu burasirazuba bwa DRC.

DRC irashinja u Rwanda gushyigikira uyu mutwe ariko u Rwanda rwakomeje gushimangira ko ibibazo by’umutekano muke mu burasirazuba bwa DRC ari ikibazo cy’imbere mu gihugu ndetse gikwiye gukemurwa na DRC.

Mu byumweru bishize, DRC yateguye imyigaragambyo yo kwamagana inyeshyamba ziri muri ako karere ndetse abayobozi b’iki gihugu bakangisha amagambo yo kugaba ibitero ku Rwanda. Icyakora, nyuma y’iminsi u Rwanda rucecetse rwatangaje ko ruzohereza ingabo zo kurinda ubusugire bwarwo mu gihe DRC yaba ibubangamiye.

Abaminisitiri bombi kandi bagize amahirwe yo kugirana ibiganiro na Perezida wa Angola, João Lourenço, usanzwe ari umuhuza mu bibazo by’u Rwanda na RDC.

Iyi nama yemeje kandi kohereza itsinda ry’ingabo z’akarere zishinzwe kugenzura ibibazo bishingiye ku mipaka (EJVM) kugira ngo zikomeze gukurikirana umutekano ku mipaka yombi cyane cyane ibibera muri Goma.

Ibyo biganiro byabanjirijwe n’inama yahuje inzego z’ubutasi mu gisirikare, igamije gusuzuma ibikorwa byo kubahiriza gahunda yashyiriweho i Luanda ku ya 6 Nyakanga 2022.

Imyanzuro yavuye muri iyo nama ivuga ko abayobozi bashinzwe inzego z’ubutasi bazakomeza ibiganiro.

Inama y’Abaminisitiri yemeje kandi ko hazabaho inama zigamije guhuza ibikorwa n’ibiganiro bya Luanda na Nairobi, basaba umuhuza kwegera ibyo bihugu mugihe byaba ngombwa.

Mu bijyanye n’ibibazo by’umutekano muke muri DRC, Perezida w’Uburundi, Évariste Ndayishimiya, n’uwahoze ari Perezida wa Kenya, Uhuru Kenyatta, ku ya 4 Ugushyingo 2022, bavuze ko inzira ya politiki ikwiye gushimangirwa hagamijwe gushaka umuti urambye ku kibazo cy’umutekano mu burasirazuba bwa DR Congo.