Rubavu: Basabwe kwitandukanya n’ibikorwa bya FDLR

Minisitiri w’Umutekano, Alfred Gasana, yabwiye abatuye Umurenge wa Bugeshi bafite abavandimwe mu mutwe wa FDLR ukorera mu Burasirazuba bwa Congo uhora ushaka guhungabanya umutekano w’u Rwanda kwitandukanya na bo.

Minisitiri w’Umutekano wasuye abatuye mu Karere ka Rubavu mu mirenge ya Busasamana na Bugeshi baturiye umupaka uhuza u Rwanda na Repubulika Iharanira Demokasi ya Congo, yabasabye ko bagomba kwirinda ibihungabanya umutekano wabo n’umutekano w’igihugu cyabo, abasaba kwirinda guca mu nzira zitazwi bwambukiranya umupaka kuko aho banyura ariho n’ushaka guhungabanya umutekano ariho yanyura.

Agira ati “Abacunga umutekano ku mbibi z’igihugu ntabamenya niba ari umuturage utashye cyangwa niba ari umugizi wa nabi, mwishyize mu mwanya wabo murumva byarangira gute?”

Minisitiri Gasana asaba abaturage gukoresha imipaka mu kwambukiranya imipaka kuko bazaba barinze ubuzima bwabo naho abaca inzira zitazwi ati “Iyo muciye inzira zitazwi biragoye kumenya umutekano wanyu no kubakurikirana, niyo mpamvu tubasaba kwirinda guca izo nzira kuko muhuriramo n’ibibazo bitandukanye.”

Ministiri w umutekano Alfred Gasana yavuze ko abahungabanya umutekano ntaho bagiye nubwo imbaraga zabo zayoyotse, ariko avuga ko nta kwirara gukwiye kubaho.

Minisitiri w’umutekano yasabye abaturage kwitandukanya n’abashaka guhungabanya umutekano w’u Rwanda kabone niyo baba abavandimwe babo.

Bamwe mu baturage babwiye itangazamakuru ko bafite abavandimwe muri FDLR ariko babashishikarije gutaha bakanga.

Agira ati “Twe twageze mu gihugu turiga, turakora twiteza imbere, ariko abandi bakomeje kunangira umutima kandi bazi neza ko mu Rwanda hari umutekano, ikimenyimenyi nuko bohereza abagore n’abana bo bagasigarayo, iyo baba batizeye ko hari umutekano ntibakohereza abana babo.”

Kuva 2012 byinshi mu bitero by’abarwanyi ba FDLR byagabwe mu Rwanda banyuze mu mirenge ya Cyanzarwe, Bugeshi na Busasamana, nubwo ingabo z’u Rwanda zihora ziri maso, hari abaturage bashinjwa gukorana na FDLR ndetse akaba aribo babereka inzira inyuramo ije guhungabanya umutekano mu Rwanda.

Abaturage mu Karere ka Rubavu babwiwe ko u Rwanda rufite ubushobozi bwo kurwanya uzashaka guhungabanya umutekano kandi n’uzashaka gutaha mu mahoro azakirwa neza.

“Abazaza neza, tuzabakira neza, ariko abazaza nabi, tuzabakira nabi.”

Umuyobozi w’Akarere ka Rubavu Kambogo Ildephonse avuga ko abaturage ba Bugeshi na Busasamana ntabibazo byinshi bafite kuko bafite ubutaka bahinga bakeza, cyakora ngo hari bake babonekaho imirire mibi asaba ko nabyo babishyiramo imbaraga nkuko bashyira imbaraga mu kwiteza imbere no kubungabunga umutekano.