Mauritania: Abanyururu bane batorotse gereza basiga bishe abashinzwe umutekano

Muri Mauritania abanyururu bane batorotse gereza mu murwa mukuru Nouakchott, basiga bishe bamwe mu bashinzwe umutekano.

Abo banyururu bivugwa ko babarizwaga mu mutwe w’intambara ntagatifu ya kislamu.

Minisitiri w’umutekanp imbere mu gihugu yatangaje ko abo banyururu bashyamiranye n’abashinzwe umutekano ubwo bageragezaga gutoroka, barasa abapolisi babiri bakomeretsa n’abandi babiri.

Mu itangazo Minisiteri yashyize ahagaragara kuri uyu wa mbere yatangaje ko abasirikare n’abapolisi bakomeje ibikorwa byo gucunga umutekano w’iyo gereza ndetse no gukomeza guhiga abo banyruru.

Nk’uko byatangajwe n’ibiro ntaramakuru iby’abafaransa AFP, babiri muri abo banyururu bari barakatiwe igihano cyo gupfa, abandi babiri bari bategereje gucibwa urubanza baregwamo kuba mu mutwe w’iterabwoba.