Burkina Faso: Abantu 15 baguye mu bitero by’iterabwoba

Muri Burukina Faso, abantu 15 biganjemo abasivili, biciwe mu bitero by’abarwanyi ba kiyisilamu, byabereye icyarimwe mu mpera z’icyumweru, mu burasirazuba bw’igihugu.

Amakuru aturuka muri ako karere no mu bashinzwe umutekano, avuga ko izi ntagondwa zishe abantu 15 barimo abasirikare batatu kuwa gatandatu. Ni mu bitero byakorewe igihe kimwe, mu mujyi wa Diapaga w’intara ya Tapoa, mu burasirazuba bwa Burukina Faso.

Kondia Pierre Yonli, umuvugizi w’umuryango wa sosiyete sivili muri ako karere, yemeje ayo makuru, avuga ko amashuri, amasoko hamwe na serivisi za Leta byahagaritswe mu karere ku wa kabiri, mu rwego rwo guha icyubahiro abahitanywe n’ibyo bitero, imibiri yabo yashyinguwe ku cyumweru mu irimbi ry’i Diapaga.

Amakuru aturuka mu bashinzwe umutekao, yavuze ko igisirikare cyihimuye ndetse ko harimo kuba ibikorwa byo mu kirere n’ibyo ku butaka mu burasirazuba, bikaba bimaze gufatrwamo abakora iterabwoba barenga 50. Ibirindiro byabo byinshi na byo byarasenywe.