Amasezerano y’agahenge hagati ya Israheli na Hamas ashobora gutinda

Amasezerano hagati ya Isirayeli na Hamas ashobora gutinda kubahirizwa kurusha uko byari biteganyijwe.

Impande zombi n’abahuza bari batangaje ko amasezerano yagombaga gutangira kuri uyu wa Kane. Ariko ku munota wa nyuma, umujyanama wa guverinona wa Israeheli, Tzachi Hanegbi, yatangaje ko bitagikunze, ahubwo ko bishobora kuzaba ejo ku wa gatanu.

Qatar, umwe mu bahuza, ni yo yabanje gutangaza ko amasezerano agiye gutinda kurusha uko byari biteganyijwe. Majed al-Ansari, umuvugizi wa minisiteri y’ububanyi n’amahanga yayo, yavuze ko hakiri ibintu bimwe na bimwe bakiganiraho, avuga ko ikindi gihe kuri aka gahenge kimenyekana mu nasaha ari imbere.

Uretse Qatar, abandi bahuza ni Leta zunze ubumwe z’Amerika na Misiri.

Mu byo amasezerano bagezeho ateganya, harimo agahenge k’iminsi ine mu mirwano hagati ya Israheli na Hamas, no kurekura abantu 50 mu bo Hamas yafashe bugwate, no gufungura Abanyapelesitina 150 bari muri gereza za Israheli.

Gusa ariko Minisitiri w’intebe wa Israheli, Benjamin Netanyahu, yatangaje ko agahenge ntaho gahuriye no kurangiza intambara.