Russi-Ukraine: Abaturage bo mu ntara ya Belgorod batangiye guhungishwa

Intara ya Belgorod y’u Burusiya ihana imbibi na Ukraine, yakuye bamwe mu baturage mu murwa mukuru wayo, ibajyana ahari umutekano nyuma y’uko ingabo za Ukraine ziharashe mu buryo bukomeye.

Ibyo byatangajwe nyuma y’umunsi umwe humvikana amasasu ijoro ryose, anakomeretsa abantu ndetse bikura umutima abaturage.

Umuyobozi w’intara ya Belgorod, Vyacheslav Gladkov mu butumwa yatanze yifashishije videwo yavuze ko abantu benshi bo muri iyo ntara ku mbuga nkoranyambaga, banditse bavuga ko bafite ubwoba ndetse banasaba kwimurirwa ahantu hatekanye.

Umujyi wa Belgorod, wari wasabye abahafite amazu, gukora ku buryo badanangira amadirishya y’inzu zabo, kugirango bayarinde kwangizwa n’amasasu.

U Burusiya bwari bwagerageje kugaragaza ko ibintu biri mu buryo mu gihugu, ariko ibitero biheruka byahitanye abantu i Belgorod, byatumye abarusiya barushaho kumenya ko ubushyamirane buri hafi yabo.

Umujyi wa Belgorod, uri mu bilometero 30 uvuye muri Ukraine kandi wakunze kwibasirwa n’icyo Moscou ivuga ko ari ibisasu biraswa bitarobanura by’ingabo za Ukraine.