Nyagatare: Aborozi barasabwa gufatira inka ubwishingizi

Umuyobozi w’akarere ka Nyagatare Mushabe David Claudian arasaba aborozi gufatira inka zabo ubwishingizi kugira ngo ipfuye nyirayo ayirihwe.

Abitangaje nyuma y’aho kuri uyu wa kabiri 24 Ukuboza inka y’uwitwa Bayingana Ronald wo mu mudugudu wa Rutare akagari ka Rutare umurenge wa Rwempasha igwiriye mu mwobo wacukuwe hagamijwe gushyirwamo amapoto ajyana umuriro w’amashanyarazi ku ikusanyirizo ry’amata rya Rwempasha igahita ipfa.

Pasiteri Rutembesa Athanase uvuga mu izina ry’umuryango wa Bayingana Ronald avuga ko urupfu rw’inka yabo rwabateye igihombo kuko uretse kuba yakamwaga ngo yanahakaga akifuza ko ubuyobozi bwacishije imyobo mu rwuri rwabo bwayishyura nibura miliyoni imwe.

Umuyobozi w’akarere ka Nyagatare avuga ko imirimo yo gushyira amapoto muri iyo myobo iri hafi kurangira ariko nanone agasaba abaturage kuba bashatse uko bayitwikira hifashishijwe ibiti kugira ngo hirindwe impanuka.

Abaturage b’umudugudu wa Rutare bavuga ko iyi myobo imaze umwaka icukuwe ndetse ngo ikaba imaze kugwamo inka 3 habariwemo iya Bayingana yapfuye kuri uyu wa 24 Ukuboza.

Umva inkuru irambuye hano: