Urubanza rwa Rusesabagina n’abo bareganwa rurasubukurwa

Yanditswe na KT Radio Team February 26, 2021 - 07:36

Kuri uyu wa Gatanu tariki 26 Gashyantare 2021, nib wo hasubukurwa urubanza ruregwamo Paul Rusesabagina n’abo bareganwa 20, ku byaha bifitanye isano n’iterabwoba byagize ingaruka ku buzima bw’Abanyarwanda n’ibyabo, bamwe barapfa abanda barakomereka.

Uru rubanza ruburanishwa n’urugereko rwihariye rw’urukiko rukuru rwashyiriweho kuburanisha ibyaha mpuzamahanga n’ibyambukiranya imipaka, ubusanzwe rukorera i Nyanza mu Ntara y’Amajyepfo, ariko rwimuriye imirimo yarwo mu cyumba cy’urukiko rw’ikirenga mu Mujyi wa Kigali.

Mu iburanisha riheruka, urukiko rwumvise imyirondoro y’abaregwa, ndetse runakira inzitizi ku bari bazifite.

Aha ni ho Paul Rusesabagina yongeye kugaragaza ko ubwenegihugu bwe Atari Umunyarwanda, ko ahubwo ari Umubiligi.

Ubwunganizi bwe kandi bwagaragaje ko ibintu bitandukanye bushingiraho bugaragaza iburabubasha ry’urukiko ku kuburanisha uru rubanza.

Icyakora Nsabimana Callixte bareganwa muri uru rubanza, akaba yarahoze ari n’umuvugizi w’umutwe wa gisirikare wa FLN, washinzwe na MRCD yayoborwaga na Rusesabagina, yagaragarije urukiko ko atewe isoni no kuba Rusesabagina atinyuka guhakana ko ari Umunyarwanda, kandi uwo uwo mutwe wa FLN wagabaga ibitero, Risesabagina yaravugaga ko afite umuganbi wo kuyobora u Rwanda.

Aha ni ho Nsabimana Callixte ahera avuga ko atiyumvisha ukuntu Rusesabagina wari umubereye umuyobozi, yashakaga kuyobora u Rwanda ari umunyamahanga.

Mu iburanisha ry’uyu munsi, urukiko rurasoma umwanzuro ku iburabubasha ryarwo mu kuburanisha uru rubanza, ndetse hanakomeze kwakirwa inzitizi ku bazifite.

Urubanza rwa Rusesabagina rwahujwe n’urwa Nsabimana Callixte na Herman Nsengimana bari abavugizi ba FLN, ndetse n’abandi bantu 18.

Tanga Igitekerezo