Paul Rusesabagina ntiyitabiriye iburanisha

Yanditswe na KT Radio Team March 24, 2021 - 09:27

Rusesabagina n’abamwunganira mu mategeko banze kwitabira iburanisha mu rubanza aregwamo hamwe n’abandi bantu 20 bose baregwa ibyaha bifitanye isano n’iterabwoba.

Urwo rubanza ruburanishwa n’Urugereko rwihariye rw’Urukiko Rukuru ruburanisha ibyaha mpuzamahanga n’ibyambukiranya imipaka, kuri uyu wa gatatu tariki 24 Werurwe 2021.

Raporo ya gereza ya Nyarugenge (Mageragere), ikubiyemo inyandiko ya Rusesabagina yasomewe mu rukiko, igaragaza ko umuburanyi Paul Rusesabagina wahamagajwe n’urukiko yanze kwitabira iburanisha yahamagawemo, mu buryo n’inzira zemewe n’amategeko ku bushake bwe.

Impamvu yagaragarije ubuyobozi bwa Gereza ya Nyarugenge, ngo ni uko ku wa 12 Werurwe 2021, Rusesabagina yabwiye urukiko ko atazongera kwitabira iburanisha ry’uru rubanza.

Rusesabagina kandi ngo yagaragaje ko usibye n’uyu munsi, n’ikindi gihe azaba yahamagajwe kuburanira muri uru rukiko atazarwitaba, kuko nta butabera arutezemo.

Urukiko rwagaragaje ko Rusesabagina yari yamenyeshejwe igihe cy’iburanisha, kandi akaba yari yanabisinyiye.

Ubushinjacyaha buvuga kuri iyi nyandiko ya Rusesabagina, bwavuze ko yanze kwitaba urukiko kandi yari abizi, ariko bukavuga ko nta cyabuza ko urubanza rukomeza kuko ari uburenganzira bw’uregwa kuba atakwitaba urukiko.

Ubushinjacyaha bwavuze ko kuba umuntu nka Paul Rusesabagina uregwa ibyaha bikomeye yakwanga kwitaba urukiko, atari ubwa mbere byaba bibaye haba mu nkiko z’u Rwanda cyangwa izo hanze, kandi muri ibyo bihe urukiko rukaba rwaragiye rufata umwanzuro wo gukemeza urubanza uregwa adahari.

Tanga Igitekerezo