Inkuru Nyamukuru

Ibigo by’amashuri bifite impungenge zo kwakira abanyeshuri bitarababonera ibibatunga

todaySeptember 23, 2022 30

Background
share close

Abayobozi b’ibigo by’amashuri ya Leta bigaburira abana ku ishuri, barasaba Minisiteri y’Uburezi (MINEDUC) kubifasha kubona amafaranga akoreshwa mu kubona ifunguro ry’abanyeshuri, kuko kugeza ubu ataraboneka.

Abana ngo ntibazongera guta ishuri cyangwa ngo batsindwe kubera gahunda yo gufatira amafunguro ku ishuri

Abo bayobozi babisabye mu gihe umwaka w’amashuri uzatangira tariki 26 Nzeri 2022, ibigo bitarabona amafaranga Leta ibigenera agomba gufasha abanyeshuri mu kubona ifunguro, ni amafaranga azwi nka ‘Capitation grant’.

Mu nama yahuje abayobozi b’ibigo by’amashuri n’ubuyobozi bw’ikigo cy’igihugu gishinzwe uburezi (REB) yabaye tariki 18 Nzeri 2022, abayobozi b’ibigo by’amashuri bagaragaje ikibazo cyo gutangira batarahabwa amafaranga, ndetse bamwe mu bavuga ko umugenzuzi w’imari abifata nk’uburangare kandi biterwa n’abayobozi ba sisiteme ya SDMS.

Umuyobozi ushinzwe uburezi mu Karere ka Rubavu, Simpeze Emmaneul yagize ati “Ubuyobozi bw’Akarere bugomba kwitaba umugenzuzi w’Imari ya Leta kubera twasabye amafaranga ya capitation grant dutinze kandi iyo twinjiyemo ntitwemerewe kuyasaba. Ubu nibafungura dutangiye gusaba tuzasanga kwaka amafaranga y’amezi ya Nyakanga na Kanama twarakererewe kuko sisiteme itari ifunguye.”

Bamwe muri abo bayobozi bavuga ko Leta yemerera amafaranga ya capitation grant ibigo by’amashuri amezi cumi n’abiri atangirana n’umwaka w’ingengo y’imari, ariko ikibazo abayobozi bahura nacyo ni uko ukwezi kwa karindwi, ukwa munani batemererwa kuyasaba no kuyahabwa, kandi bagomba kwitegura kwakira abanyeshuri mu kwezi kwa cyenda.

Umwe muribo yabwiye Kigali Today ko n’ubwo amashuri ubu agiye gutangira, ibigo bitarabona amafaranga.

Ati “Kuva mu kwezi kwa Karindwi, ntiturahabwa amafaranga ya capitation grant, ubu batwemereye kuyasaba kugeza mu mpera za Nzeri, bivuze ko n’ubwo tuzakira abanyeshuri tariki ya 26 Nzeri biragoye kubona icyo tugaburira abana.”

Uyu muyobozi avuga ko kudahererwa amafaranga igihe bitera igihombo.

Ibigo bya Leta n’ibifashwa na Leta bisabwa kugaburira abanyeshuri ku ishuri hagendewe ku mafaranga byahawe, bamwe mu bayobozi bavuga ko ari amafaranga makeya, mu gihe n’ababyeyi bamwe batajya batanga amafaranga yo kunganira atangwa na Leta.

Uyu mwaka Minisiteri y’Uburezi yashyizeho amafaranga y’ishuri ntarengwa ku bigo bya Leta ndetse igaragaza amafaranga ababyeyi bagomba kujya batanga yo gutunga abanyeshuri, abayobozi b’ibigo bavuga ko ari amafaranga makeya atajyanye n’ibiciro ku masoko.

Umwe ati “Ibiciro ku isoko bizamuka umunsi ku munsi, kandi ibigo by’amashuri bigenerwa amafaranga makeya bigatuma kugaburira abana uko bikwiye bigorana, cyane cyane iyo ari ugutanga amasoko kuko rwiyemezamirimo aba azi ko azishyurwa bitinze.”

Umuyobozi w’akarere wungirije ushinzwe imibereho myiza y’abaturage, Ishimwe Pacifique, yabwiye abayobozi b’ibigo ko bashobora kujya kugura ku masoko, ariko bo bavuga ko bitabakundira kubera amafaranga abageraho atinze.

Abayobozi b’ibigo baganiriye na Kigali Today batangaza ko umwana wiga mu mashuri y’incuke n’abanza ya Leta n’afafashwa na Leta, agenerwa amafaranga abarirwa mu bihumbi umunani (8,000 Frw) ku gihembwe, mu gihe abiga mu mashuri yisumbuye umunyeshuri agenerwa amafaranga 56 Frw ku munsi.

Written by: KT Radio Team

Rate it

Previous post

Inkuru Nyamukuru

IBUKA izakomeza gusaba ubutabera no kwamagana icyemezo gifungura Bucyibaruta

Mu gitondo cyo kuri uyu wa Gatanu tariki 16 Nzeri 2022,Perezida w’Umuryango IBUKA uharanira inyungu z’abarokotse Jenoside yakorewe Abatutsi, Egide Nkuranga, yatangaje ko IBUKA izakomeza kwamagana icyemezo cy’urukiko rwa rubanda rwa Paris gifungura Laurent Bucyibaruta. Laurent Bucyibaruta Urukiko rwa rubanda i Paris mu Bufaransa ruherutse guhamya uwari Perefe wa Perefegitura ya Gikongoro uruhare muri Jenoside yakorewe Abatutsi muri Perefegitura ya Gikongoro yayoboraga, nyuma yo gushinjwa ibyaha bya Jenoside n’ibyibasiye inyokomuntu. […]

todaySeptember 23, 2022 16

Post comments (0)

Leave a reply

Your email address will not be published. Required fields are marked *

0%