General Jean Bosco Kazura yahererekanyije ububasha na Lt General Mubarakh Muganga

Lt Gen Mubarakh Muganga yatangiye inshingano ze nshya nk’Umugaba Mukuru w’Ingabo z’u Rwanda, asimbuye Gen Jean Bosco Kazura wari umaze imyaka itatu, amezi atandatu n’umunsi umwe kuri uwo mwanya.

Umuhango w’ihererekanyabubasha wabereye ku Cyicaro Gikuru cy’Ingabo z’u Rwanda, aho usibye kuba Gen Kazura yahererekanyije ububasha na Lt Gen Mubarakh Muganga, na we yasigiye ububasha Maj Gen Vincent Nyakarundi wamusimbuye ku mwanya w’Umugaba w’Ingabo zirwanira ku Butaka.

Perezida Kagame akaba n’Umugaba w’Ikirenga w’Ingabo z’u Rwanda, ku gicamunsi cyo kuri uyu wa Kabiri kandi yazamuye mu ntera Col Godfrey Gasana usanzwe ari Umugaba wungirije w’Ingabo zirwanira mu Kirere, amuha ipeti rya Brigadier General.

Izi mpinduka zatangajwe na Minisiteri y’Ingabo, zikaba zije zikurikira izaraye zikozwe mu nzego z’umutekano aho Juvenal Marizamunda yagizwe Minisitiri mushya.

Marizamunda Juvenal yasimbuye kuri uwo mwanya Major General Albert Murasira. Marizamunda akaba yari asanzwe ari Umuyobozi Mukuru w’Urwego rw’u Rwanda rushinzwe Igorora (RCS).