DRC: Aboyobozi b’inyeshyamba boherejwe kugarura amahoro muri Ituri

Leta yohereje abahoze bayoboye imitwe y’inyeshyamba zarwaniraga muri iki gihugu, kugarura amahoro mu turere baturukamo two mu ntara ya Ituri, hagamijwe kumvikanisha imitwe ihanganye igahagarika intambara.

Intumwa zigizwe n’abahoze bafite uruhare mu ntambara zabaye mu gihe cyahise, barimo babiri bigeze gukatirwa n’urukiko mpuzamahanga mpanabyaha rw’I La Haye.

Abo ni Germain Katanga wakatiwe n’urwo rukiko muri 2014 washinjwaga guhutaza uburenganzira bwa muntu, n’ibyaha by’intambara, ubwo umutwe yari ayoboye w’abarwanyi bo mu bwoko bw’aba Lendu wagabaga igitero cyahitanye abantu bagera ku 200.

Undi ni Mathieu Ngudjolo, nawe waburanishijwe n’uru rukiko ashinjwa ibyaha nkibyo ariko nyuma akaza kurekurwa.

Muri iyo ntara ya Ituri, abantu bitwaje intwaro baherutse kwica abantu 11 harimo abasirikare n’abategetsi b’akarere mu gitero cyitiriwe inyeshyamba za CODECO zimaze igihe zishinjwa ubwicanyi.