Minisiteri y’Ingabo z’u Rwanda yatangaje ko ingabo z’u Rwanda zaraye zishe babiri mu barwanyi b’umutwe wa FLN, bateye u Rwanda baturutse ahitwa Giturashyamba muri Komini mabayi mu Burundi.

Ibyo byabaye mu ijoro ryo ku Cyumweru tariki 23 Gicurasi 2021, hagati ya saa tatu n’iminota 15 na saa tatu n’iminota 35, aho abo barwanyi ba FLN binjiye ku butaka bw’u Rwanda bambukiye ku mugezi wa Ruhwa, binjira mu Rwanda nka metero 100, mu Murenge wa Bweyeye mu Karere ka Rusizi.

Abo barwanyi bahise bagwa mu gico cy’Ingabo z’u Rwanda, babiri muri bo barahagwa, hafatwa n’ibikoresho byabo birimo imbunda imwe ya machine gun, magazines zirindwi z’amasasu, gerenade imwe, iradio ya gisirikare imwe ndetse n’imyambaro ibiri y’impuzankano z’igisirikare cy’u Burundi.

Mu itangazo rigenewe abanyamakuru ryasohotse kuri uyu wa mbere, Igisirikare cy’u Rwanda kiravuga ko abo barwanyi bahise basubira mu Burundi, mu ishyamba ry’Ikibira aho basanzwe bafite ibirindiro.